1.1 Hovudinnhaldet i proposisjonen

I proposisjonen blir det fremja forslag til endringar i følgande lover:

• Lov 28. februar 1997 nr. 19 om folketrygd

• Lov 28. juli 1949 nr. 26 om Statens pensjonskasse

• Lov 26. juni 1953 nr. 11 om pensjonsordning for apotekvirksomhet mv.

• Lov 6. juli 1957 nr. 26 om samordning av pensjons- og trygdeytelser

• Lov 22. juni 1962 nr. 12 om pensjonsordning for sykepleiere

• Lov 10. desember 2004 nr. 76 om arbeidsmarkedstjenester

• Lov 10. juni 2005 nr. 51 om norsk statsborgerskap

• Lov 12. februar 2010 nr. 4 om pensjonsordning for oppdragstaker i statlig beredskapshjem eller spesialisert fosterhjem

• Lov 19. februar 2010 nr. 5 om statstilskott til arbeidstakere som tar ut avtalefestet pensjon i privat sektor

• Lov 25. juni 2010 nr. 28 om avtalefestet pensjon for medlemmer av Statens pensjonskasse

• Lov 24. november 2023 nr. 83 om endringer i lov om Statens pensjonskasse og enkelte andre lover (opphevelse av minstegrensen for rett til medlemskap).

Etter utgreiingsinstruksen punkt 3-3 femte ledd kan ein unnlate å høyre forslag som gjeld statsbudsjettet, då dei kan vere unntatt frå offentlegheit etter offentleglova § 22. Forslaga som følger av framlegget til statsbudsjett, har derfor ikkje vore på høyring. Dei forslaga som ikkje inneber nokon realitetsendringar, har heller ikkje vore på høyring, sidan høyring av desse har blitt rekna som «åpenbart unødvendig», jf. utgreiingsinstruksen punkt 3-3 andre ledd tredje kulepunkt.

Forslaget om lovheimel for Statens pensjonskasse til å inngå avtale med andre pensjonsleverandørar om fordeling av kostnader for ny avtalefesta pensjon (AFP) i lov om avtalefestet pensjon for medlemmer av Statens pensjonskasse har heller ikkje vore på høyring. Forslaget blir likevel fremja då det er nødvendig å få på plass ein slik heimel før pensjonsutbetalingane startar frå 2025. Det vil i praksis ikkje vera mogleg å gjennomføre ei høyring av forslaget før dette, og høyring kan derfor unnlatast i samsvar med utgreiingsinstruksen punkt 3-3 andre ledd første kulepunkt.

1.2 Endringar i reglane om samordning mellom dagpengar og offentleg tenestepensjon – folketrygdlova § 4-26

Som følge av forslag som er lagde fram i Prop. 1 S (2024–2025) Statsbudsjettet 2025, er det nødvendig med endringar i reglane som inneber at dagpengane ikkje blir reduserte som følge av at mottakaren samtidig får utbetalt tenestepensjon frå ei pensjonsordning som er utforma i samsvar med prinsippa om nøytralt og fleksibelt uttak.

Det blir foreslått å endre reglane om samordning mellom dagpengar under arbeidsløyse og offentleg tenestepensjon. Alderspensjon og avtalefesta pensjon (AFP) frå dei offentlege tenestepensjonsordningane er no lagt om til pensjonar med fleksibelt og nøytralt uttak for dei som er født i 1963 eller seinare, på same måte som pensjonane frå dei private tenestepensjonsordningane og alderspensjonen frå folketrygda. Omlegginga gjeld likevel ikkje for dei som er omfatta av den lovfesta pensjonsordninga for apotektilsette. Dagpengane blir ikkje reduserte for dei som får utbetalingar frå private tenestepensjonsordningar. Som følge av dette bør dagpengane ikkje lenger bli reduserte når dagpengemottakarane får pensjon frå offentlege tenestepensjonsordningar som er utforma på same måte.

Sjå forslaget til endringar i folketrygdlova § 4-26 første ledd bokstav a.

Departementet foreslår at endringa tar til å gjelde 1. januar 2025.

Budsjetteffekten av å oppheve samordningsregelen mellom dagpengar og ny offentleg tenestepensjon er berekna til tilnærma null i 2025.

Endringa vil innebere ei administrativ meirbelastning for Arbeids- og velferdsetaten.

1.3 Skjermingstillegg til tidlegare mottakarar av uføretrygd

Som følge av forslag i statsbudsjettet for 2025 blir det foreslått ei utviding av kven som kan få skjermingstillegg i alderspensjonen frå folketrygda etter å ha mottatt uføretrygd ved fylte 67 år, jf. folketrygdlova § 19-9 a. Forslaget inneber å utvide skjermingsordninga til også å omfatte uføre fødd i perioden 1954 til 1962.

Det blir foreslått at prosentsatsen for desse årskulla blir sett lik prosentsatsen til 1953-kullet.

Sjå forslaget til endring av folketrygdlova § 19-9 a.

Det blir foreslått at endringane tar til å gjelde 1. januar 2025.

Samla effekt på statsbudsjettet i 2025 er anslått til 393 mill. kroner, medan dei administrative kostnadene av forslaget er anslått til 3 mill. kroner i 2025.

1.4 Overgangsordning ved oppheving av minstegrensa for rett til medlemskap i lovfesta offentleg tenestepensjonsordning

I lov 24. november 2023 nr. 83 om endringar i lov om Statens pensjonskasse og enkelte andre lover blir det foreslått ei overgangsordning ved oppheving av minstegrensa for rett til medlemskap i lovfesta offentleg tenestepensjonsordning.

Det blir foreslått at endringane tar til å gjelde straks. Endringane skjer i endringslova i saka, og endringslova kan gjelde frå 1. januar 2025. Endringane vil ikkje få nokon økonomiske konsekvensar samanlikna med gjeldande regelverk. Det er vanskeleg å anslå dei økonomiske kostnadene ved overgangsordninga for arbeidsgivarane som finansierer ordningane. Dei administrative konsekvensane inneber at pensjonsleverandørane må handtere situasjonen som eit unntak frå dei normale reglane.

1.5 Ny heimel til å gi forskrift om ytingar under deltaking i forsøk med arbeidsmarknadstiltak – arbeidsmarknadslova § 13

I arbeidsmarknadslova blir det foreslått ein ny heimel til å gi forskrift om ytingar under deltaking i forsøk med arbeidsmarknadstiltak i eit nytt fjerde ledd i § 13.

Sjå forslaget til endring av arbeidsmarknadslova § 13.

Det blir foreslått at endringane tar til å gjelde straks.

Endringa har venteleg ikkje økonomiske konsekvensar. Administrative konsekvensar vil bli handtert innanfor den gjeldande budsjettramma.

1.6 Heimel til å gi forskrift om delt pensjonsgrunnlag i lov om Statens pensjonskasse og lov om pensjonsordning for apotekvirksomhet mv.

I lov om Statens pensjonskasse og lov om pensjonsordning for apotekvirksomhet mv. blir det foreslått ein heimel til å gi forskrift i lov om Statens pensjonskasse og lov om pensjonsordning for apotekvirksomhet mv. om delt pensjonsgrunnlag slik at reglane kan bli gjort tydelege om delt pensjonsgrunnlag. Dette gjeld tilfelle der pensjonsgrunnlaget ikkje berre skal bereknast av sluttlønna, men også av eit tidlegare pensjonsgrunnlag.

Forslaget har vore på høyring.

Sjå forslaget til endringar i lov om Statens pensjonskasse § 15 og lov om pensjonsordning for apotekvirksomhet mv. § 8.

Det blir foreslått at endringane trer i kraft så raskt som mogleg etter at lova er vedtatt. Forslaga har ingen økonomiske eller administrative konsekvensar.

1.7 Pensjonsopptening for oppdragstakarar i beredskapsheim og spesialisert fosterheim med avtale med Oslo kommune

Det blir foreslått endringar i lov 12. februar 2010 nr. 4 om pensjonsordning for oppdragstaker i statlig beredskapshjem eller spesialisert fosterhjem. Formålet er at oppdragstakarar i beredskapsheim eller spesialisert fosterheim med avtale med Oslo kommune også blir omfatta av lova.

Forslaget har vore på høyring.

Sjå forslaget til endringar i lov om pensjonsordning for oppdragstaker i statlig beredskapshjem eller spesialisert fosterhjem, tittelen på lova og § 1.

Det blir foreslått at medlemskapet gjeld frå 1. juli 2025.

Det vil i revidert nasjonalbudsjett for 2025 bli fremma forslag om statleg dekning av netto meirutgifter som er knytt til oppteninga. Medlemskap i Statens pensjonskasse for oppdragstakarar i Oslo kommune har i lita grad administrative konsekvensar.

1.8 Presiseringar knytt til innføringa av nye reglar om offentleg AFP for dei som er fødde i 1963 eller seinare

Det blir foreslått endringar i lov 25. juni 2010 nr. 28 om avtalefestet pensjon for medlemmer av Statens pensjonskasse. Endringane gjeld presiseringar knytt til innføringa av nye reglar om offentleg AFP for dei som er fødde i 1963 eller seinare.

Forslaget har vore på høyring.

Sjå forslaget til ny § 13 sjuande ledd i lov om avtalefestet pensjon for medlemmer av Statens pensjonskasse.

Sjå forslaget til endringar i lov om avtalefestet pensjon for medlemmer av Statens pensjonskasse § 7, § 8 og § 9.

Sjå lovforslaget, lov om avtalefestet pensjon for medlemmer av Statens pensjonskasse § 13.

Ny AFP får verknad frå 1. januar 2025. Dei tidlegare lovendringane er trådd i kraft frå 1. oktober 2024 av omsyn til Statens pensjonskasse si administrering av ordninga, og det blir foreslått at endringane no trer i kraft straks og blir gitt verknad frå 1. oktober 2024.

Forslaget vil ikkje medføre økonomiske eller administrative konsekvensar utover det som følger av vedtekne endringar i lov om avtalefestet pensjon for medlemmer av Statens pensjonskasse.

1.9 Forslag som inneber tydeliggjering, lovfesting av praksis, språklege justeringar m.m.

Det blir foreslått enkelte rettingar, presiseringar og lovtekniske justeringar som dels gjer reglane tydelegare og dels lovfester gjeldande praksis, herunder:

• Innhaldslistene i innleiinga til folketrygdlova og til dei enkelte kapitla i folketrygdlova blir oppheva. Forslaget har vore på høyring.

• Reglane om forsørgingstillegg i folketrygdlova §§ 3-24 til 3-26 blir oppheva fordi det tidlegare er vedtatt at tillegga fell heilt bort frå 1. januar 2025. Som ei følge av opphevinga av reglane om forsørgingstillegg, blir det foreslått lovtekniske justeringar og tilpassingar i folketrygdlova §§ 3-3, 12-15, 19-3, 19-8 og 22-16 og i lov om avtalefestet pensjon for medlemmer av Statens pensjonskasse §§ 3 og 4.

• I folketrygdlova kapittel 4 om dagpengar under arbeidsløyse blir det foreslått endringar som inneber klargjeringar, forenklingar og lovfesting av gjeldande praksis. Forslaga har vore på høyring.

• I folketrygdlova kapittel 11 om arbeidsavklaringspengar blir det foreslått fire mindre endringar som inneber klargjering og forenkling av regelverk til fordel for mottakarane av stønaden.

• I folketrygdlova kapittel 13 blir det foreslått endringar i tilvisingar som følge av endringar i andre kapittel i folketrygdlova og i andre lover.

• Retting av skrivefeil i folketrygdlova § 20-4.

• Retting av feil i arbeidsmarknadslova § 22.

• I statsborgarlova blir det foreslått ei presisering i § 2 første ledd for å gjera det tydeleg at Sysselmeisteren på Svalbard kan behandle personopplysningar til eigne formål, på same måte som andre aktørar som behandlar saker etter statsborgarlova. Det blir vidare foreslått ei oppdatering av pliktsubjektet i lova i § 29 b første ledd bokstav j, og ein inkurie i § 7 tredje ledd blir retta opp.

• I dei tre tenestepensjonslovene for Statens pensjonskasse, apotekverksemd og sjukepleiarar blir det presisert at uførepensjon ikkje skal bli inntektsavkorta for overgangsstønad etter folketrygdlova kapittel 15 og 17 A, også når uførepensjonen er ein bruttopensjon, det vil seie i dei tilfella det ikkje er noka uføreyting frå folketrygda saman med tenestepensjonen.

• Overskriftene til samordningslova §§ 24 a og 24 c blir endra slik at det tydeleg kjem fram kven som er omfatta av føresegnene. Forslaga har vore på høyring.

• Omtala av bruttoberekna barnepensjon frå offentleg tenestepensjonsordning blir tatt ut av tre føresegner i samordningslova. Det er fordi det ikkje lenger er nokon som får slik pensjon. Forslaget har vore på høyring.

• Forslaget som gjeld AFP-tilskottslova, gir heimel til Arbeids- og velferdsdirektoratet til å fastsette forholdstal for arbeidstakarar fødde i 1963 eller seinare ut frå prinsippa som kjem fram av folketrygdlova § 19-7.

Det blir foreslått at desse endringane tar til å gjelde straks:

• Oppheving av innhaldslistene i folketrygdlova

• endringa i folketrygdlova § 8-49

• endringar i regelverket for arbeidsavklaringspengar – folketrygdlova kapittel 11

• retting av lovteknisk feil i folketrygdlova §§ 13-2 og 13-11

• retting av skrivefeil i folketrygdlova § 20-4

• retting av feil i arbeidsmarknadslova § 22

• presiseringar og retting av feil i statsborgarlova

• ny heimel for å fastsette forholdstal i AFP-tilskottslova for arbeidstakarar fødd i 1963 eller seinare.

Det blir foreslått at desse endringane tar til å gjelde frå 1. januar 2025:

• Endringane om oppheving av føresegner om ektefelletillegg og barnetillegg til alderspensjon – folketrygdlova kapittel 3, 12, 19 og 22 og lov om avtalefestet pensjon for medlemmer av Statens pensjonskasse §§ 3 og 4

• Endringane i regelverket for dagpengar under arbeidsløyse i folketrygdlova kapittel 4.

Det blir foreslått at desse endringane trer i kraft så raskt som mogleg etter at lova er vedtatt:

• Endringane om at overgangsstønad frå folketrygda ikkje inngår i inntektsprøvinga av uførepensjon frå offentleg tenestepensjonsordning

• presisering om kven som er omfatta av samordningslova § 24 a og § 24 c

• utfasa bruttoberekna barnepensjon frå offentleg tenestepensjonsordning – endringar i samordningslova.

Ingen av forslaga over har økonomiske konsekvensar.

Forslaget om endringar i regelverket for dagpengar under arbeidsløyse i folketrygdlova kapittel 4 kan gi nokre administrative forenklingar.

Forslaget om endring av folketrygdlova § 11-18 om arbeidsavklaringspengar til ein person som skal vurderast for uføretrygd, kan innebere noka administrativ innsparing.

Forslaget om heimel for å fastsette forholdstal i AFP-tilskottsloven for arbeidstakarar fødd i 1963 eller seinare har små administrative konsekvensar for Arbeids- og velferdsdirektoratet.

Dei andre forslaga har ingen administrative konsekvensar.