Under programområde 02 Utanriksforvaltning blir det gjort framlegg om å auke løyvingane med om lag 865 mill. kroner. Auken har i hovudsak samanheng med høgare utgifter under kap. 117 EØS-finansieringsordningane i år.

Under programområde 03 Internasjonal bistand blir det gjort framlegg om auka sivil støtte til Ukraina med 1,5 mrd. kroner som ein del av ei styrking av Nansen-programmet på 5 mrd. kroner. Det blir gjort framlegg om auka militær støtte under Forsvarsdepartementet med 3,5 mrd. kroner. Dermed vert Noreg sitt totale bidrag gjennom Nansen-programmet for Ukraina på 27 mrd. kroner i 2024. Med det nye forslaget vil den sivile støtta auke til 10 mrd. kroner, og den militære støtta til 17 mrd. kroner.

Nye overslag tilseier at flyktningutgiftene i Noreg som kan godkjennast som internasjonal bistand (ODA) blir lågare i år enn budsjettert etter revidert nasjonalbudsjett for 2024 (RNB 2024). Det blir gjort framlegg om å redusere løyvinga med 928,6 mill. kroner som omprioriterast til anna bistand, mellom anna til Palestina, helse, utdanning, fornybar energi og natur.

Styrkinga av Nansen-programmet gjer at bistandsbudsjettet aukar med 1,5 mrd. kroner samanlikna med revidert nasjonalbudsjett 2024, til 55,5 mrd. kroner i 2024. Dette utgjer 1,01 pst. av BNI-anslaget lagt til grunn for 2024-budsjettet.