Samferdselsdepartementet legg i proposisjonen fram forslag om revidert bompengeopplegg og finansieringsplan for fv. 659 på strekninga Skjeltene–Harøya (Nordøyvegen) i Ålesund kommune (tidlegare Haram og Sandøy kommunar) i Møre og Romsdal.

Stortinget har tidlegare gitt tilslutning til bompengefinansiering av prosjektet gjennom handsaminga av Prop. 140 S (2016–2017) Finansiering av prosjektet fv. 659 Nordøyvegen i Møre og Romsdal og Innst. 468 S (2016–2017).

Etter stor kostnadsauke vedtok fylkestinget i Møre og Romsdal fylkeskommune i 2018 nytt finansieringsopplegg for prosjektet. Dei auka kostnadene er foreslått finansierte med fylkeskommunale midlar og auka bompengebidrag.

Hovudarbeida starta tidleg i 2019, den sørlege delen av prosjektet blei opna for trafikk i desember 2021 og siste del av prosjektet er venta opna for trafikk sommaren 2022.

Nordøyvegen består av tre undersjøiske tunnelar, ein landtunnel og tre bruer og vil gje fast vegsamband til Lepsøya, Haramsøya, Flemsøya, Fjørtofta og Harøya/Finnøya. Desse øyane blir omtalte som Nordøyane. Prosjektet er nærare omtalt i Prop. 140 S (2016–2017) Finansiering av prosjektet fv. 659 Nordøyvegen i Møre og Romsdal.

Styrings- og kostnadsramma var opphaveleg fastsett til 3 442 mill. 2017-kroner og 3 786 mill. 2017-kroner. I 2022-prisnivå svarer dette til 4 058 mill. kroner og 4 464 mill. kroner. Bompengedelen var fastsett til 460 mill. 2017-kroner, dvs. 13,4 pst. av styringsramma. I 2022-prisnivå utgjer dette eit bompengebidrag på 542 mill. kroner.

Etter at tilbodsutlysinga for hovuddelen av prosjektet var avslutta, blei det klart at faktiske tilbod var vesentleg høgare enn føresett. Beste tilbod på hovudkontrakten var om lag 1 200 mill. 2018-kroner høgare enn det som låg til grunn i siste overslag. Fylkestinget i Møre og Romsdal vedtok 11. desember 2018 å auke styringsramma til 4 900 mill. 2018-kroner. Kostnadsramma blei fastsett til 5 340 mill. 2018-kroner.

I november 2020 gjorde fylkesutvalet vedtak om å auke styrings- og kostnadsramma for å forsere opninga av delar av prosjektet. Etter denne justeringa er styringsramma for prosjektet på 5 564 mill. 2022-kroner og kostnadsramma på 6 062 mill. 2022-kroner.

Etter vedtak i fylkestinget blei hovudkontrakten inngått og prosjektet starta opp. For å sikre finansieringa av prosjektet legg Møre og Romsdal fylkeskommune til grunn ein auke i bompengebidraget på 134 mill. 2022-kroner til prosjektet i forhold til det som var lagt til grunn i Prop. 140 S (2016–2017).

Det er gjennomført ei ny ekstern kvalitetssikring (KS2) av bompengeopplegget for fv. 659 Nordøyvegen, som blei ferdig i februar 2021. Kvalitetssikringa har omfatta finansieringsgrunnlag, trafikkgrunnlag og finansieringsevne. Ifølgje ekstern kvalitetssikrar er bompengefinansieringa robust då det blir teke utgangspunkt i eit konservativt trafikkanslag og bompengelånet lèt seg finansiere under føresetnadene til prosjektet. Vidare viser analysen at fylkeskommunen ikkje kan finansiere lånedelen sin basert på ferjeavløysingsmidlar og andre tilskot/overføringar åleine, og må finne andre budsjettmessige innsparingar eller inntektskjelder for å kunne betene lånet.

Det er fylkeskommunen som har ansvaret for heile byggjeprosjektet.

Finansieringsopplegget for fv. 659 Nordøyvegen omfattar fylkeskommunale midlar og eit bompengebidrag. Dette inneber at Møre og Romsdal fylkeskommune er ansvarleg for nødvendige låneopptak for å finansiere framtidige kommunale tilskot knytt til prosjektet. Kostnadsauken i prosjektet er føresett finansiert med ein auke i fylkeskommunale midlar og bompengebidraget. Fylkeskommunale midlar utgjer om lag 87,9 pst. og bompengebidraget om lag 12,1 pst. av finansieringa. Eventuell auke ut over kostnadsramma er fylkeskommunen sitt ansvar og kan ikkje dekkjast med bompengar. Eventuelle kostnadsreduksjonar på inntil 10 pst. skal delast mellom fylkeskommunale midlar og bompengar etter same prosentvise fordeling som innanfor styringsramma.

Samla finansielt bidrag frå fylkeskommunen er rekna til 4 888 mill. kroner. I dette inngår mellom anna mva-kompensasjon og bidrag frå kommunar og næringsliv i form av tilskot. Ferjeavløysingsmidlar inngår òg i fylkeskommunen sitt finansieringsopplegg. Fylkeskommunen er derfor ansvarleg for nødvendige låneopptak for å finansiere prosjektet, uavhengig av storleiken på framtidige tilskot, kompensasjonar og ferjeavløysingsmidlar.

I Prop. 140 S (2016–2017) Finansiering av prosjektet fv. 659 Nordøyvegen i Møre og Romsdal og Innst. 468 S (2016–2017) blei det lagt til grunn eit bompengebidrag på 460 mill. 2017-kroner, som innebar at bompengar skulle stå for om lag 13,4 pst. av finansieringa. Det utgjer om lag 542 mill. 2022-kroner. Bompengebidraget er foreslått auka med 134 mill. kroner til 676 mill. 2022-kroner.

Samferdselsdepartementet viser i proposisjonen til at dei har merka seg den store kostnadsauken i prosjektet og at Møre og Romsdal fylkeskommune likevel har starta opp prosjektet før Stortinget har handsama nytt bompengeopplegg. Departementet legg til grunn at lokale styresmakter har vurdert det som nødvendig å utvide finansieringsramma gjennom auka takstar og å forlenge innkrevjingsperioden for bompengar for fv. 659 Nordøyvegen i Møre og Romsdal, for å kunne finansiere prosjektet.

Hovudregelen om 15 eller 20 års innkrevjingsperiode i bompengeprosjekt står fast, men departementet foreslår at det blir gjort unntak for ein innkrevjingsperiode på 25 år, grunna den vesentlege kostnadsauken i prosjektet. Vidare legg departementet til grunn at dersom økonomien for bompengeselskapet blir betre enn føresett, skal dette i første omgang nyttast til å redusere innkrevjingsperioden, ikkje til reduserte takstar, slik at dei samla finansieringskostnadene blir så låge som mogleg.