Samferdselsdepartementet legg i proposisjonen fram forslag om finansiering av prosjektet fv. 359 Kaste–Stoadalen i Nome kommune i Vestfold og Telemark. Prosjektet gjeld bygging av 2,9 km tofelts fylkesveg i ny trasé.

Fv. 359 gjennom Stoadalen er svingete, trong, har låg trafikktryggleik og er lite skikka til ferdsel for mjuke trafikantar. Delar av vegstrekningen ligg tett opp til verneverdige bustadområde. Framkomma for tunge køyretøy på dagens veg er svært redusert. Utbygginga omfattar etablering av 2,9 km ny fylkesveg på strekningen Kaste–Stoadalen.

Det blir lagt opp til anleggsstart i løpet av 2021 med ferdigstilling i 2023.

I tidsperioden 1977–2019 har det vore 43 ulykker. Frå 2010 til 2019 har det vore 2 ulykker med alvorleg skadde, 5 med lettare skadde og 2 med ukjent skadeomfang, totalt 9 ulykker.

Kostnadane til prosjektet, inkludert etablering av ein bomstasjon, er rekna til 306 mill. 2019-kroner. Omrekna til 2020-prisnivå er kostnadsoverslaget 314,7 mill. kroner.

Finansieringa er basert på fylkeskommunale midlar og bompengar. Med utgangspunkt i prosjektet sitt kostnadsoverslag på 313,7 mill. 2020-kroner inkl. mva. inneber dette eit fylkeskommunalt bidrag på 178,4 mill. kroner og eit bompengebidrag på 135,3 mill. kroner.

Telemark fylkeskommune behandla saka i møte i fylkestinget 12. desember 2019. Vestfold og Telemark fylkeskommune behandla saka i møte i fylkestinget 1. september 2020 og fatta vedtak i tråd med Statens vegvesen si tilråding om garanti ved sjølvskuldarkausjon for eit maksimalt låneopptak avgrensa til 192 mill. kroner. Det samla garantibeløpet blir 211,2 mill. kroner. Vestfold og Telemark fylkeskommune sitt garantiansvar blir redusert i takt med den faktiske nedbetalinga av Vegfinans Vestfold og Telemark AS og Vegfinans fv. 359 Kaste–Stoadalen AS si gjeld.

Nome kommune behandla saka i møte i bystyret 5. desember 2019. Reguleringsplanen for prosjektet blei vedteken av Nome kommune 8. desember 2016.

Den samfunnsøkonomiske netto nytta til prosjektet er rekna til om lag –209 mill. kroner. Netto nytte per budsjettkrone er rekna til –0,81. Utan bompengefinansiering er den samfunnsøkonomiske netto nytta til prosjektet rekna til om lag –220 mill. kroner, og netto nytte per budsjettkrone er rekna til –1,93.

Det er lagt til grunn bompengeinnkrevjing i 15 år. I finansieringsutrekningane er det lagt til grunn etterskotsvis bompengeinnkrevjing i perioden 2024–2038.

Basistakstar for passering blir 25 kroner i takstgruppe 1 og 50 kroner i takstgruppe 2.