Søk

Innhold

Sammendrag

Rogaland fylkeskommune og Stavanger, Sandnes, Sola og Randaberg kommunar er samde om å vidareføre satsinga på vegtiltak gjennom ei ny bompengepakke.

Det er venta stor folketalsvekst på Nord-Jæren. Lokale styresmakter ønskjer at trafikkveksten innan persontransport skal takast med kollektivtransport, sykling og gåing. Pakka skal styrke kollektivtilbodet og tilhøva for fotgjengarar og syklistar, særleg til område med stor næringsverksemd som Forusområdet.

Samferdselsdepartementet legg i proposisjonen fram forslag om finansiering av ei bypakke for Nord-Jæren, i tråd med vedtak frå lokale folkevalde styresmakter. Pakka vil omfatte prosjekt og tiltak i Stavanger, Sandnes, Sola og Randaberg kommunar.

Målet for bypakka er nullvekst i personbiltrafikken fram mot 2032, samt god framkomst for alle trafikantgrupper med hovudvekt på kollektivtransport, sykling, gåing og næringslivstransport. Lokale styresmakter legg til grunn at trafikkveksten framover skal takast med kollektivtransport, sykling og gåing.

For å nå målet om nullvekst i personbiltrafikken og meir effektiv transport på Nord-Jæren er det lokalt vedtatt å gjennomføre følgjande hovudtiltak:

  • Etablering av sykkelekspressveg mellom Stavanger og Sandnes via Forus

  • Etablering av eit samanhengande bussystem på Nord-Jæren (Bussveien)

  • Etablering av ein transportkorridor for næringslivet på vestsida av dei mest folketette bustadområda (Transportkorridor vest) samt utbetring av E39 på strekningane Ålgård–Hove og Smiene–Harestad.

Det er lagt opp til bompengeinnkrevjing i 15 år frå 2018. Gjennomføringa av tiltak vil starte i 2017.

Det legges opp til porteføljestyring av Bypakke Nord-Jæren med årlig rullering av fireårige handlingsprogrammer.

Aktuelle prosjekt og tiltak

Tabell 4.1 Bypakke Nord-Jæren – kostnader for aktuelle prosjekt og tiltak

Mill. 2016-kr

Tiltak

Kostnad

Vegtiltak1

12 000

Transportkorridor vest2

4 300

E39 Ålgård–Hove

3 550

E39 Smiene–Harestad

3 200

Fv. 505 Foss Eikeland–E39

750

E39/rv. 44 Krysstiltak/vegutviding Stangeland

200

Bussveien2

7 200

Andre kollektivtrafikktiltak

3 350

Sykkelekspressveg Stavanger–Sandnes

1 300

Programområdetiltak

3 150

Kollektivtrafikk

1 050

Sykkel

1 050

Trafikktryggleik, gange, miljø

1 050

Drift av kollektivtransport

3 150

Bygging av bomstasjonar

200

Transportsystem Sandnes øst (planlegging)

50

Sum

30 400

1Ekskl. statlege midlar til E39 Eiganestunnelen etter 2018 samt bompengar til dette og andre igangsette prosjekt (føresett dekka innafor eksisterande pakke).

2Dei delane av Bussveien som er fellesstrekning med Transportkorridor vest inngår i kostnadsoverslaget for Transportkorridor vest (kostnadsrekna til om lag 3 000 mill. kr).

Ved den lokalpolitiske handsaminga hausten 2014 var kostnadene for aktuelle prosjekt og tiltak førebels kalkulerte til vel 24 mrd. 2014-kr. Det var knytt stor uvisse til mange av overslaga. Etter nye kostnadsvurderingar for enkelte delprosjekt er kostnadene no kalkulerte til i storleiksorden 30 mrd. 2016-kr.

Det er gjennomført ekstern kvalitetssikring (KS2) av trafikk- og finansieringsføresetnadene for Bypakke Nord-Jæren og for første etappe av sykkelekspressvegen. I den samanhengen har den eksterne konsulenten også vurdert oppgitte kostnader for andre aktuelle prosjekt. Fleire av tiltaka i pakka er på eit tidleg planstadium. Det ligg derfor føre til dels stor uvisse knytt til kostnadsoverslaget for pakka. Det skal gjennomførast eigne KS2-prosessar for dei store prosjekta innafor Bypakke Nord-Jæren, når tilstrekkelege avklaringar ligg føre. Prosjektporteføljen må tilpassast til dei samla økonomiske rammene for bypakka. Den eksterne konsulenten har vurdert den samfunnsøkonomiske lønsemda i pakka, og er komen til at alle delane (sykkelekspressveg, Bussveien, vegprosjekta) har vesentleg negativ nettonytte.

Trafikkgrunnlag

Totaltrafikken gjennom dei planlagde bomsnitta er rekna til om lag 242 800 køyretøy per døgn. Innføringa av bompengeinnkrevjing er venta å redusere trafikken til om lag 218 500 køyretøy per døgn, tilsvarande 10 pst. For næringslivstransportar er det lagt til grunn ein årleg trafikkvekst i tråd med prognosane som vart nytta i arbeidet med NTP 2014–2023.

Bompengeopplegg

Det skal etablerast 38 bomstasjonar med einvegs innkrevjing, i fem soner.

Som det går fram av proposisjonens kapittel 3, har Rogaland fylkeskommune gått inn for eit takstsystem med einvegs innkrevjing og tre takstgrupper: lette køyretøy med totalvekt under 3 500 kg, tunge køyretøy med totalvekt mellom 3 500 og 7 500 kg, og tunge køyretøy med totalvekt over 7 500 kg. For nærmare omtale av rabatt- og takstopplegg syner ein til proposisjonen.

Føresetnadene som er lagt til grunn for vurdering av bompengepotensialet, er:

  • Innkrevjingsperiode: 15 år frå 2018.

  • Lånerente: 5,5 pst. dei første 10 åra, deretter 6,5 pst.

  • Innskotsrente: 2,5 pst.

  • Årlege innkrevjingskostnader: 160 mill. kroner.

Basert på føresetnadene er brutto bompengeinntekter rekna til om lag 25,2 mrd. kroner. Av dette er om lag 21 mrd. kroner føresett nytta til gjennomføring av prosjekt og tiltak innafor Bypakke Nord-Jæren, om lag 1,8 mrd. kroner til å dekke finansieringskostnader og om lag 2,4 mrd. kroner til å dekke innkrevjingskostnader og kostnader til drift av bompengeselskapet. Det er lagt til grunn at bompengeselskapet vil stille til disposisjon inntil 650 mill. kroner i 2017.

Finansieringsopplegg

Finansieringa er basert på innkrevjing av bompengar samt statlege og fylkeskommunale midlar. Opplegget er beskrive i kapittel 7 i proposisjonen. I tillegg til eit bompengebidrag på om lag 21 mrd. 2016-kr og statlege midlar vil òg refundert meirverdiavgift nyttast til investeringar. I tillegg har Samferdselsdepartementet gjennom det fastsette rammeverket for bymiljø-/byvekstavtalar lagt til grunn statleg delfinansiering på inntil 50 pst. av prosjektkostnadene for viktige fylkeskommunale kollektivtransportprosjekt i dei fire største byområda. Bussveien på Nord-Jæren er eit slikt prosjekt.

Aktuelle vegprosjekt vil bli vurderte i samband med utarbeidinga av Nasjonal transportplan 2018–2029. Eventuell igangsetjing av vegprosjekt må vurderast i samband med dei årlege budsjetta.

Rogaland fylkeskommune fatta i møte i fylkestinget 9. desember 2014 vedtak om å stille garanti for eit låneopptak på inntil 7,0 mrd. 2014-kr.

Med nivået på bompengar og fylkeskommunale midlar som omtala i denne proposisjonen, og statlege midlar som føresett i Meld. St. 26 (2013–2014) Nasjonal transportplan 2014–2023, blir det samla bidraget til gjennomføring av Bypakke Nord-Jæren på nærare 24 mrd. kroner. Det samla omfanget av statlege midlar vil bli nærare avklart gjennom forhandlingane om ein byvekstavtale, arbeidet med Nasjonal transportplan 2018–2029, dei årlege budsjetta og tilhøyrande handlingsprogram.

Neste kapittel