Forslagsstillarane viser til at arkivverket
i dag har ein landsomfattande organisasjon med eit sentralorgan,
Riksarkivet, og åtte regionale institusjonar, statsarkiv. I tillegg
kjem to meir spesialiserte einingar med landsomfattande oppgåver: Samisk
arkiv og det komande Norsk helsearkiv.
Forslagsstillarane viser til at gjennom handsaminga
av arkivmeldinga (Meld. St. 7 (2012–2013)) slo Stortinget fast at
nettverket av statsarkiv i regionane bør haldast oppe og at vilkåra
bør leggjast til rette for at statsarkiva kan spele ei sentral rolle
i etablering og drift av nye integrerte løysingar. Stortinget gav
si tilslutning til at statsarkiva, i tillegg til dei regionale oppgåvene,
også kan ta på seg ein del oppgåver for etaten under eitt, uavhengig
av geografisk tilknyting. Forslagsstillarane viser til at Stortinget
meinte at ei slik utplassering av etatsoppgåver kan vere med på
å styrkje det regionale elementet i etaten og utnytte fagkompetansen
og kreativiteten på ein optimal måte.
Forslagsstillarane er gjort kjende med at Riksarkivaren
no planlegg omorganisering av Arkivverket til ein felles organisatorisk
eining styrt frå Oslo. Omorganiseringa vil innebere at dei åtte
regionale statsarkiva vil verte lagt ned som eigne institusjonar.
Forslagsstillarane viser til at det skal ikkje lenger vere ein regional
leiing på kvar enkelt stad, og omgrepet «Statsarkiv» forsvinn. Den
føreslåtte omlegginga er omfattande og vil svekke det regionale
arkivarbeidet. Omlegginga skal etter planen tre i kraft allereie
ved årsskiftet.
Forslagsstillarane fryktar at den regionale
og lokale kompetansen forsvinn dersom dei regionale institusjonane
vert avvikla og ingen skal ha ansvar for å leie arbeidet regionalt.
Den føreslåtte omorganiseringa frå Riksarkivaren
er etter forslagsstillarane sitt syn klart i strid med Stortinget
sin intensjon ved handsaminga av arkivmeldinga om å styrkje det
regionale nivået. Avvikling av statsarkiva som sjølvstendige einingar
kan ikkje gjerast i ein intern omorganiseringsprosess. Arkivverket
er definert i arkivlova § 4.
Forslagsstillarane fremjar følgjande forslag:
«1. Stortinget ber regjeringa
oppretthalde og styrkje dei åtte regionale statsarkiva som eigne institusjonar.
2. Stortinget ber regjeringa fremje sak
for Stortinget dersom det vert føreslått endringar i det statlege
Arkivverket si organisering.»