Helse- og omsorgsdepartementet foreslår i proposisjonen
ein heimel i pasientskadelova for at Kongen i forskrift kan bestemme
kva for institusjonar under den kommunale helse- og omsorgstenesta
som skal vere omfatta av pasientskadelova.
Pasientskadelova gjeld i dag skade påført i
institusjon under kommunehelsetenesta, det vil seie sjukeheimar
og døgnplassar for akutt hjelp. Lova omfattar i dag ikkje institusjonar
som tidlegare var omfatta av sosialtenestelova, det vil seie barnebustader,
rusinstitusjonar og aldersheimar.
Ny lov om kommunale helse- og omsorgstenester
tok til å gjelde 1. januar 2012, og samstundes blei sosialtenestelova
og kommunehelsetenestelova oppheva. I samband med den nye lova om kommunale
helse- og omsorgstenester blei det vedteke ei endring av pasientskadelova
§ 1 første ledd bokstav a. Endringa innebar at omgrepet «kommunehelsetenesta»
skulle erstattast av omgrepet «den kommunale helse- og omsorgstenesta»,
slik at lova skulle gjelde skade påført i institusjon under spesialisthelsetenesta og
den kommunale helse- og omsorgstenesta. Etter ordlyden innebar endringa
ei utviding av verkeområdet for pasientskadelova til også å omfatte
institusjonar som tidlegare var regulerte i sosialtenestelova, det
vil seie barnebustader, rusinstitusjonar og aldersheimar.
Forslaget må sjåast i samanheng med Helse- og omsorgsdepartementet
sitt forslag til forskrift, der det går fram at alle institusjonar
etter helse- og omsorgstenestelova, også barnebustader, rusinstitusjonar
og aldersheimar, skal reknast som institusjon etter pasientskadelova.
Forslag om ein heimel i pasientskadelova for
at Kongen i forskrift kan bestemme kva som skal reknast som institusjon
under den kommunale helse- og omsorgstenesta, vart sendt på høyring i
desember 2012 med høyringsfrist i februar 2013. 27 høyringsinstansar
har kome med realitetsmerknader.
Forslaget vil i seg sjølv ikkje ha økonomiske eller
administrative konsekvensar. Departementet finn grunn til å tru
at ei utviding av pasientskadelova til å omfatte barnebustader,
aldersheimar og rusinstitusjonar vil få svært avgrensa økonomiske
konsekvensar. Eventuelle erstatningsutbetalingar knytte til institusjonane som
no blir foreslått omfatta av pasientskadeordninga, vil bli dekte
gjennom innbetalingar frå kommunane tilsvarande andre erstatningsutbetalingar
knytte til kommunale institusjonar.