Prosjektet er omtalt i St.prp. nr. 59 (2008–2009) Om
utbygging og finansiering av E6 Øyer (Granrudmoen)–Tretten i Øyer
kommune i Oppland, samt i Prop. 1 S (2009–2010). Samferdselsdepartementet
har lagt til grunn ei styrings- og kostnadsramme for prosjektet
på 880 mill. kroner og 950 mill. kroner, omrekna til 2009-prisnivå.
Styringsramma er fordelt med 777 mill. kroner på E6, 94 mill. kroner
på rv 254 og 9 mill. kroner til bygging av bomstasjonar (2009-prisnivå).
Hovudentreprisen for prosjektet vart lyst ut
i haust, med tilbodsfrist 15. oktober 2009. I samband med Statens
vegvesen si vurdering av dei innkomne tilboda har Statens vegvesen
blitt merksam på at det i berekninga av kostnadene knytt til prosjektet
er gjort einskilde, til dels grove feil. Konsekvensen er at kostnadene
knytt til utbygginga vil auka med 250 mill. kroner utover styringsramma.
Det er gjennomført ekstern kvalitetssikring
av styringsunderlag og kostnadsoverslag (KS2) for prosjektet. Regjeringa
la konsulenten sitt forslag til økonomiske rammer til grunn og rekna
desse om til 2009-kroner.
Samferdselsdepartementet vil i samarbeid med Statens
vegvesen gå gjennom rutinane for fastsetjing av kostnadsoverslag
for å vurdera om det er behov for endringar i desse rutinane.
Trass i kostnadsauken legg Samferdselsdepartementet
til grunn at prosjektet skal gjennomførast slik departementet opphavleg
har lagt til grunn.
Samferdselsdepartementet vil vidare gjennomføre
ei ekstern kvalitetssikring av Statens vegvesen si nye og reviderte
kostnadsberekning av dei elementa i prosjektet som ikkje inngår
i hovudenterprisa. Dersom kvalitetssikringa gjer det naudsynt med
ytterlegare justeringar av styrings- og kostnadsramma for prosjektet,
vil departementet kome tilbake til dette som ei eiga sak.
Kostnadsauke ut over kostnadsramma skal dekkjast
av staten/fylkeskommunen. Dette medfører følgjande finansieringsplan
basert på revidert kostnadsoverslag, jf. tabell 2.1 i proposisjonen.
Tabell 2.1
| St.prp. nr. 59
(2008–2009) | Endring | Revidert
finansieringsplan |
Statlege midlar
| 385 | 180 | 565 |
Fylkeskommunale
midlar | 38 | 34 | 72 |
Bompengar | 457 | 36 | 493 |
Sum | 880 | 250 | 1 130 |
Statens vegvesen tilrådde at bompengeselskapet forskotterer
den statlege og fylkeskommunale delen av meirkostnadene mot refusjon
i 2014. Oppland fylkeskommune behandla forslaget til revidert finansieringsplan
for prosjektet i møte i fylkesutvalet 10. november 2009. For å sikra
at prosjektet blir gjennomført i tråd med vedtekne planar, aksepterer
fylkesutvalet å dekkja 34 mill. kroner av kostnadsauken over fylkeskommunen sitt
budsjett. Samstundes meiner fylkesutvalet at i utgangspunktet bør
staten dekkja kostnadsauken.
Departementet legg til grunn at kostnadsauken på
250 mill. kroner skal finansierast i samsvar med den reviderte finansieringsplanen.
Kostnadsauke ut over dette skal dekkjast med statlege midlar for
E6-delen og fylkeskommunale midlar for rv 254-delen.