1. Samandrag

      Regjeringa legg i meldinga fram årsmelding for Statens Fiskarbank for 1995 og 1996.

       Stortinget vedtok, i samsvar med Ot.prp.nr.15 (1996-1997) Om lov om oppheving av lov av 28. april 1972 nr. 22 om Statens Fiskarbank i november 1996 (Integrering av Statens Fiskarbank i Statens nærings- og distriktsutviklingsfond) at Statens Fiskarbank (SFB) skulle integrerast i Statens nærings- og distriktsutviklingsfond (SND) frå 1. januar 1997. Det vert difor peika på at den meldinga som ligg føre er den siste meldinga om verksemda i Fiskarbanken.

       Statens Fiskarbank kunne i 1995 yte tilskot under ei kontraktsramme på 560  mill. kroner, med ei tilhøyrande låneramme på 150  mill. kroner til lån under ordninga for fiskebåtfinansiering, og 150  mill. kroner til lån til andre formål. I 1996 kunne banken frå byrjinga av året yte kontraheringstilskot innanfor ei kontraktsramme på 560  mill. kroner. Den tilhøyrande låneramme var på 150  mill. kroner, og 150  mill. kroner til lån til andre formål. Ved handsaminga av Revidert nasjonalbudsjett 1996 blei det vedteke å auke løyvinga til kontraheringstilskotet til 65  mill. kroner.

       Fram til 1. juli 1995 hadde banken ei utlånsrente på 8 % på alle ordinære 1. og 2. prioritetslån. Frå 1. juli 1995 vart utlånsrenta for alle lån sett til 7,5 %, ei rente som vart justert vidare ned til 7 % frå 1. juli 1996.

       I retningslinene for Fiskarbanken si verksemd for åra 1995 og 1996 var det lagt vekt på behovet for ei nedbygging av flåten for å tilpasse kapasiteten til dei tilgjengelege ressursane. Sidan den gjennomsnittlege alderen i flåten er relativt høg og aukande, vart banken beden om å leggje auka vekt på å fremme investeringar til nybygging av fiskefartøy i 1996.

       Det vert peika på at det er registrert ein markert auke i interessa for nybygg og ombyggingar frå 1995 til 1996. Dette synast å ha samanheng med at torskekvotane igjen er oppe på eit meir normalt nivå, samtidig som sildefiskeria har teke seg kraftig opp. Følgjeleg er innteningsevna i flåten markant høgare enn ho har vore dei seinare åra.

       Det har vore problematisk å få fullfinansiert prosjekta ettersom kapitalkostnaden lett overstig forventa inntening. Det er difor gledeleg at situasjonen har endra seg i positiv retning i løpet av dei to åra denne meldinga omhandlar.

       Avdelingskontora har i perioden 1995-1996 disponert ein del av totalrammene. Vidare har det vore lagt til grunn at over halvparten av alle tilsegner skulle gå til Nord-Noreg. Denne målsettinga har i stor grad vorte innfridd.

       I 1995 hadde Statens Fiskarbank eit overskot på nærare 13,6  mill. kroner før avsetningar og tap. Dei realiserte tapa i 1995 var i underkant av 20  mill. kroner.

       Resultatrekneskapen for 1996 vart gjort opp med eit overskot på vel 9  mill. kroner, som vart plussa på Vågnadsfondet. Vågnadsfondet ved utgangen av 1996 var på 40  mill. kroner.

       Når det elles gjeld Fiskarbanken si økonomiske stilling, viser ein til omtalen under kap. 2414 i St.prp. nr. 1 (1994-1995) og St.prp. nr. 1 (1995-1996) for Fiskeridepartementet, og til St.prp. nr. 1 Tl.05 (1996-1997) Løyvingar ved integrering av Statens Fiskarbank i Statens nærings- og distriktsutviklingsfond, andre endringar under Fiskeridepartementet og ny rammeavtale med Redningsselskapet.

       Administrering av ymse støtteordningar har tidvis kravt ein stor del av ressursbruken i Fiskarbanken, men omfanget av ordningane har minka dei seinare åra, i takt med den positive utviklinga i fiskerinæringa. Totalt stod 11 ulike særordningar under banken sin administrasjon i 1995 og ni i 1996.

       Totalt handsama banken 173 søknader om ulike tilskot i 1995 og 199 søknader i 1996.

2. Merknader frå komiteen

     Komiteen viser til handsaminga av Ot.prp.nr.15 (1996-1997) der det vart vedteke å integrere Fiskarbanken i Statens nærings- og distriktsutviklingsfond (SND) frå 1. januar 1997.

       Komiteen har merka seg at samanslåinga har skjedd og at SND no har teke over oppgåvene som tidlegare vart ivaretekne av Fiskarbanken.

       Komiteen sitt fleirtal, alle unnateke medlemene frå Framstegspartiet, vil i samband med dette peike på at departementet må sjå til at fiskerinæringa vert gitt høg prioritet innanfor SND-systemet.

       Fleirtalet har merka seg at det har vore aukande interesse for nybygg og ombyggingar i 1995 og 1996. Fleirtalet vil i denne samanhengen peike på at det er viktig at flåten vert fornya kontinuerleg av omsyn til tryggleiken for fiskarane. Det er difor viktig at det vert lagt til rette for å halde fornyingstakta oppe på eit høgt nivå. Slik fornying må sjølvsagt sjåast i samanheng med den overordna fiskeripolitikken og ynskje om å tilpasse fangstkapasiteten til dei tilgjengelege ressursane.

       Komiteens medlemmer fra Fremskrittspartiet viser til meldingen som gjelder Fiskarbankens virksomhet med å gi subsidierte lån og tilskudd som begunstiger fiskerinæringen. Disse medlemmer er prinsipielt motstandere av at statsbanker skal kanalisere risikokapital som i stor utstrekning er selektive, skattefinansierte støtte- og låneordninger. Disse medlemmer mener at aktører i fiskerinæringen skal søke finansiering i private banker, kreditt- og finansieringsinstitusjoner på lik linje med ordinær næringsvirksomhet.

       Disse medlemmer viser for øvrig til Fremskrittspartiets merknader og forslag i Dok.nr.8:55 (1991-1992) og B.innst.S.nr.8(1993-1994).

3. Komiteen si tilråding

    Komiteen har elles ingen merknader, viser til meldinga og rår Stortinget til å gjere slikt

       St.meld. nr. 9 (1997-1998) - om verksemda til Statens Fiskarbank i rekneskapsåra 1995 og 1996 - vert å leggje ved protokollen.