Oslo Lufthavn AS - finansiering av kommersielle tilleggsinvesteringar

3.1 Samandrag

       Kostnadsramma i hovudplanen for flyplassen på Gardermoen er på totalt 11,4 mrd. 1992-kroner, fordelt med 9,7 mrd. 1992-kroner til utbygging og 1,7 mrd. 1992-kroner til kjøp av grunn og erstatning. Utbyggingskostnadene på 9,7 mrd. 1992-kroner tok utgangspunkt i kva som er naudsynt for å realisere ein funksjonell flyplass, basert på faste dimensjoneringskriterium.

       I proposisjonen vert det foreslått å auke låneramma for 1997 til Oslo Lufthavn AS med 320 mill. kroner til finansiering av fleire kommersielt lønsame prosjekt.

       Dei aktuelle prosjekta omfattar m.a. ekstra investeringar i teknisk flyteneste, innreiing av areal, infrastruktur i form av vegar, kabelkanalar m.m. til fraktbygg, garasjar og verkstader, diverse investeringar i samband med ombygging og opprusting av eksisterande ekspedisjonsbygg og overtekne bygningar, bygging av parkeringsplassar m.m. Etter avtale med Justisdepartementet byggjer OSL også eit politibygg i tilslutning til sitt eige administrasjonsbygg. Politibygget blir oppført av OSL for utleige til Justisdepartementet etter inngått avtale.

       Det er i første rekkje brukarane av flyplassen som har tatt initiativ til og ønskjer å få prosjekta realisert i samband med utbygginga. Prosjekta må derfor gjennomførast no. Samstundes vil det vanlegvis ut frå bygningsmessige og praktiske tilhøve vere naudsynt at Oslo Lufthavn AS står som faktisk investor og eigar.

       Det er etter Samferdselsdepartementet si vurdering viktig at den vedtekne kostnadsramma for hovudflyplassen ikkje set grense for gjennomføring av tiltak som sikrar lønsemda i hovudflyplassprosjektet. Det vil bli etablert eit eige forretningsområde innanfor Oslo Lufthavn AS, der styret i selskapet ivaretek denne type kommersielle investeringar.

3.2 Komiteens merknader

       Komiteens fleirtal, alle unnateke medlemene frå Høgre, sluttar seg til proposisjonen.

       Komiteens medlemmer fra Høyre har som mål at Oslo Lufthavn AS skal drives økonomisk og servicemessig effektivt der brukernes interesser er av sentral betydning. De kommersielle prosjekter regjeringen viser til i proposisjonen bør realiseres etter konkurranse om forretningsdrift og om etablering av tilhørende bygningsmasse. Disse medlemmer finner det ikke forsvarlig at gjennomføring av kommersielle prosjekter gis Oslo Lufthavn AS uten konkurranse.

       Disse medlemmer vil på denne bakgrunn gå imot å øke lånerammen til Oslo Lufthavn AS med 320 mill. kroner for 1997.