Forslagsstillarane meiner at nye tilsettingsstoff, auka matimport, nye produksjonsmåtar og ei meir intensiv landbruksdrift aukar behovet for eit strengt regelverk, betre kontroll og auka viten om den maten vi et og korleis den er produsert. Den store bruken av plantevernmiddel og sprøytemiddel i landbruket gjev grunn til otte. Ei større satsing på miljøvenlege driftsformer i landbruket vil ha positive verknader både på miljøet og matkvaliteten. Forslagsstillarane syner vidare til at undersøkingar har synt at mange forbrukarar ynskjer lettare tilgong til matvarer som er økologisk dyrka.

       Det er etter forslagsstillarane si meining behov for klårare reglar for merking av matvarer. For menneske som reagerer allergisk mot stoff, eller som av andre grunnar skal unngå inntak av visse stoff, er slik merking heilt turvande. Merking gjev vidare forbrukarane høve til å velja mellom ymse produkt. Merking av matvarer gjev òg forbrukarane ei monaleg makt til å påverka matproduksjonen slik at den betre tek vare på miljø og helse.

       Forslagsstillarane meiner at fleire land er komne lengre enn Noreg når det gjeld omlegging til økologisk landbruksproduksjon. Forslagsstillarane meiner at Noreg, til liks med land som t.d. Sverige, Sveits og Østerrike, bør setja klåre målsettingar for kor stor del av landbruksproduksjonen som skal leggjast om til økologiske dyrkingsformer. For å auka etterspurnaden må dei økonomiske verkemidla rettast inn slik at økologisk produsert mat ikkje vert dyrare til forbrukarane enn matvarer som er produserte på tradisjonelt vis.

       Dei målsettingane som er sette for økologisk produsert mat i Landbruksdepartementet si « Handlingsplan for videre utvikling av økologisk landbruk », er særs lite konkrete, etter forslagsstillarane si meining. Forslagsstillarane ynskjer difor at det vert utarbeidd ei stortingsmelding som inneheld ei målsetjing om at økologiske landbruksvarer skal ha ein marknadsdel på minst 10 % i år 2000.

       På denne bakgrunnen vert fylgjande framlegg teke opp:

       « Stortinget ber Regjeringa om å utarbeide ei stortingsmelding om økologisk matproduksjon i samsvar med dette dokumentet. »