Til Stortinget.
Kommunal- og arbeidsdepartementet viser i proposisjonen til at Noreg i løpet av 1992-1994 har motteke 20 pasientar med følgjepersonar gjennom programmet for medisinsk evakuering frå det tidlegare Jugoslavia. Noreg har no fått førespurnad frå FNs Høgkommissær for flyktningar (UNCHR) og International Organization for Migration (IOM) om å ta imot ytterlegare fem pasientar.
På bakgrunn av situasjonen i det tidlegare Jugoslavia er det grunn til å tru at Noreg vil få fleire slike førespurnader. Regjeringa gjer difor framlegg om at Noreg opnar for mottak av ytterlegare 20 pasientar med følgjepersonar for medisinsk behandling. Dette vil koste ca 10 mill. kroner i 1995.
Det gjerast fremlegg om at midlane løyvast over ein ny overførbar post 70 Medisinsk evakuering på kap. 520 Utlendingsdirektoratet. Løyvingsbehovet vert dekka ved ein tilsvarande reduksjon av løyvinga på kap. 520, post 21 Spesielle driftsutgifter, statlige mottak. Dette er mogleg då talet på nye asylsøkjarar er mindre enn ein trudde tidlegare.
