Oppstillinga under viser hovudtala for budsjett og rekneskap i 1993 (i mill. kroner):

Tabell 15. Avvik, budsjett, rekneskap

			Nysaldert
		S. III	budsjett	Avvik	Rekneskap	Avvik
		1	2	3=2-1	4	5=4-2
A	Underskot før lånetransaksjonar
	ekskl. petroleumsverksemd og
	oljeskattar	76.744	74.720	-2.024	71.895	-2.825
B	Nettoinntekt av petroleumsverksemd
	og oljeskattar	25.143	28.442	3.299	28.022	-420
C	Underskot før lånetransaksjonar	51.601	46.278	-5.323	43.873	-2.405
D	Utlån og avdrag, netto	36.824	24.047	-12.777	22.880	-1.167
E	Finansieringsbehov	88.425	70.325	-18.100	66.753	-3.572

       Ved nysalderinga av budsjettet for 1993 vart dei totale utgiftene nedjusterte med 13.120 mill. kroner medan dei totale inntektene auka med 4.980 mill. kroner samanlikna med vedteke budsjett (B.innst.S.nr.III). Samla finansieringsbehov - som utgjorde 88.425 mill. kroner i B.innst.S.nr.III - vart dermed redusert med 18.100 mill. kroner til 70.325 mill. kroner. Dette hadde særleg samanheng med reduserte utgifter til lånetransaksjonar, som vart nedjusterte med 12,8 mrd. kroner. Hovudårsaken til dette var at lån til statsbankane vart redusert med 10.050 mill. kroner samtidig med at tilbakebetaling av lån frå statsbankane vart auka med 3.300 mill. kroner. I tillegg vart utgiftene utanom lånetransaksjonar og petroleumsverksemd redusert med vel 2 mrd. kroner medan anslaga på nettoinntektene frå petroleumsverksemda vart oppjustert med 3,3 mrd. kroner. Hovudkomponentane i endringane i finansieringsbehovet var (i mill. kroner):

---

Dagpengar 500

Reduserte utgifter sjukepengar -837

Auka inntekter, Folketrygden, netto -450

Auka inntekt av oljeskattar og

statleg petroleumsverksemd -3.299

Auka skattar og avgifter -904

Betre rentebalanse -725

Reduserte utlån, netto -12.777

Diverse, netto 392

---

I alt -18.100

---

       Rekneskapen for 1993 viser eit finansieringsbehov på 66.753 mill. kroner eller 3.572 mill. kroner mindre enn ved nysalderinga av budsjettet. Tabell 15 ovanfor viser at om lag 80 % av forbetringa skriv seg frå nedgang i det oljekorrigerte underskotet på 2.825 mill. kroner. Av denne forbetringa skriv om lag halvparten, 1.468 mill. kroner, seg frå auka inntekter. Netto oljeinntekter er redusert med 420 mill. kroner, medan netto utlån er redusert med 1.167 mill. kroner.

       I Innst.S.nr.24 (1993-1994) om statsrekneskapen medrekna folketrygda for 1992, uttalte finanskomiteen følgjande:

« Komiteen meiner at eit avvik mellom nysalderinga og rekneskapen på vel 6,6 mrd. kroner er monaleg. Komiteen ber Regjeringa vurdere om det er mogeleg til den årlege nysaldering å få fram materiale og vurderingar, slik at det blir større samsvar mellom nysaldering og rekneskap. »

       Sjølv om avviket mellom nysaldert budsjett og rekneskapen for 1993 er mindre enn det var for 1992, vil Finansdepartementet følgje oppmodinga frå komiteen. Departementet vil vurdere kva som kan gjerast for å kome fram til sikrare overslag i budsjettarbeidet, og vil kome attende til saka i nysalderinga av statsbudsjettet for 1994.

       I meldinga er avviket på 3.572 mill. kroner brote ned på hovudkomponentar (i mill. kroner) og kommentert nærare.