Presidenten var i Strasbourg for å signere avtalen om oppretting av ein spesialdomstol for rettsforfølging av Russlands angrep på Ukraina og brot på folkeretten.

Det var PACE som først tok til orde for etablering av ein slik domstol allereie kort tid etter at krigen starta i 2022, og har sidan den gong jobba for at dette skal kunne bli ein realitet.

I talen til Europarådets parlamentarikarforsamling (PACE) takka president Zelenskyj PACE for sitt bidrag og arbeid for oppretting av denne domstolen. Signeringa av avtalen er første steg mot rettsforfølging av krigsforbrytarar og dei som er ansvarlege for angrepet på Ukraina i 2022.

– Det var ei høgtidleg stund då president Zelenskyj talte til forsamlinga, seier delegasjonsleiar Ingjerd Schie Schou (H).

– Zelenskyj understreka betydninga av rettsforfølging av dei som ansvarlege for krigen. Det er grunnleggande viktig i seg sjølv at krigsforbrytarar ikkje slepp unna straff, men ein reell rettsprosess er òg viktig for ein framtidig rettferdig og varig fred, seier Schou (H).

President Zelenskyy hails Europe’s commitment to justice in an address to PACE as aggression tribunal is signed (pace.coe.int).

Midtausten og Gaza

Den spente situasjonen i Midtausten sette stort preg på sesjonen, og det var stort engasjement i hastedebatten med tittelen «Global peace under threat: halting the humanitarian catastrophe in Gaza and addressing the wider conflict in the Middle East» der Ingjerd Schie Schou var rapportør.

Den klare bodskapen frå PACE var de-eskalering av konflikten, respekt for internasjonal lov og krav om å gjere alt ein kan for å skåne sivile frå krigens herjingar og sørgje for at humanitær hjelp kjem fram utan hindringar.

– Dette var ein vanskeleg debatt med stor polariserande kraft. Det var derfor viktig for meg å få til ein rapport der PACE talar med éi stemme og samstundes vere tydeleg på det grunnleggjande: de-eskalering av konflikten, stanse lidingane på Gaza, tryggje humanitær hjelp og fornye oppslutninga om multilateralt samarbeid. Ein institusjon som Europarådet eg PACE må stå opp for regelbasert internasjonalt samarbeid framfor aleinegang. Eg er derfor glad for at rapporten blei vedteken med stort fleirtal, seier Schou (H).

Aktiv delegasjon

Stortinget delegasjon, som bestod av Lise Christoffersen (A), Morten Wold (FrP), Jone Blikra (A) og Linda Hofstad Helleland (H), deltok aktivt i fleire av sesjonens debattar.

Jone Blikra (A) deltok i debatten som oppsummerte PACEs observasjon av parlamentsvalet i Albania i mai. Morten Wold (FrP) engasjerte seg i debatten om juridiske og menneskerettslege konsekvensar av krigen i Ukraina. Linda Hofstad Helleland, i kraft av si rolle som leiar for PACEs kulturkomité, var aktiv i debatt om å fremje menneskerettar i og gjennom idretten.

Lise Christoffersen (A) hadde møter med ulike representantar for sivilsamfunnet i Aserbajdsjan i kraft av si rolle som rapportør for Aserbajdsjans oppfølging av sine forpliktingar som medlem av Europarådet. Ho deltok òg med innlegg i open høyring om situasjonen for fengsla journalistar i Aserbajdsjan.

Andre saker på PACEs agenda var mellom anna debatt om den europeiske menneskerettsdomstolen opp mot dagens utfordringar, migrasjon, likestilling og politiske fangar i Georgia.

For meir informasjon, sjå PACEs nettsider.