Bakgrunn
6. oktober 2022 blei det fremmja eit innbyggjarinitiativ
om grensejustering mellom kommunane Ålesund og Aukra, med forslag
om å overføre øyane Ona-Husøya og Sandøya i Ålesund kommune til
Aukra kommune.
Som eit resultat av innbyggjarinitiativet kom
Statsforvaltaren i Møre og Romsdal med ei tilråding før jul 2024
om grensejustering, slik at Ona-Husøya og Sandøya skulle bli ein
del av Aukra kommune. Øyane grensar ikkje til resten av Ålesund
kommune, og det er vesentleg kortare reiseavstand til Aukra kommune.
Dei 43 fastbuande innbyggjarane vil ikkje utgjere nokon vesensskilnad
for Ålesund kommune med sine 58 500 innbyggjarar. I søknaden frå
innbyggjarane, frå 2016, trekkjer dei fram at innbyggjarane rettar
seg mot Aukra og Romsdalen med tanke på tenester og næringsliv,
at Molde er nærmaste by, og at innbyggjarane kjenner ei tilknyting
til Romsdalen i form av handel, språk, kultur og tradisjonar. Eit
stort fleirtal av innbyggjarane, på 75 prosent, har i ei innbyggjarundersøking
svart at dei ønskjer å bli ein del av Aukra kommune.
Den 7. februar 2025 varsla ny kommunal- og distriktsminister
Kjersti Stenseng (Ap) at det likevel ikkje blir noka grensejustering
for Sandøya og Ona-Husøya –dette etter at dåverande kommunal- og
distriktsminister Erling Sande (Sp) veka før støtta tilrådinga frå
Statsforvaltaren om grensejustering.
Senterpartiet er bekymra for signaleffekten
ved å overkøyre eit slikt innbyggjarinitiativ som har fått sterk fagleg
støtte. Senterpartiet er òg bekymra for innbyggjarane sitt reelle
høve til deltaking i lokaldemokratiet i Ålesund, og høve til å påverke
tenestetilbodet sitt. Dette på grunn av særs lang reiseveg målt
i tid. Det vil i praksis vere eit hinder for deltaking i folkevalde
organ som kommunestyre og formannskap. Statsforvaltaren trekkjer
òg fram følgjande:
«At innbyggerne føler identitet og tilhøyrsle
til sin kommune, vil i eit lokaldemokratisk perspektiv vere viktig.
Det kan mellom anna ha betyding for innbyggarane si moglegheit for
å påverke det kommunale tenestetilbodet. Sterk identitet og tilhøyrsle
kan også ha betyding for kor aktivt innbyggarane deltek i lokaldemokratiet.»
Sjølv om Ålesund kommune har vore gjennom større
omstillingar dei siste åra, der Haram blei tvinga inn i Ålesund
før dei fekk «sleppe fri» att, så er det vanskeleg å sjå for seg
at det vil vere ei stor påkjenning å miste desse 43 innbyggjarane.