Søk

Innhold

1. Samandrag

1.1 Innleiing

I proposisjonen legg Barne- og likestillingsdepartementet (BLD) fram endringsforslag i statsbudsjettet for 2016 i samsvar med punkt 1.2 nedanfor.

1.2 Endringsforslag

Kap. 800 Barne- og likestillingsdepartementet

Post 1 Driftsutgifter

Ansvaret for integreringssaker blei overført frå Barne- og likestillingsdepartementet til Justis- og beredskapsdepartementet 1. april 2016, jf. Prop. 59 S (2015–2016) og Innst. 194 S (2015–2016).

På bakgrunn av endelege berekningar av dei faktiske utgiftene knytt til integreringsområdet ved overføringstidspunktet, føreslår BLD å redusere løyvinga på kap. 800 post 1 med 0,9 mill. kroner mot ein tilsvarande auke på kap. 400 post 1 under Justis- og beredskapsdepartementet.

Kap. 840 Tiltak mot vald og overgrep

Post 61 Tilskot til incest- og valdtektssenter, overslagsløyving

Saksbehandling og tilskotsutbetaling for incest- og valdtektssenter er no gjennomført. Det er tildelt 1,4 mill. kroner mindre enn lagt til grunn i gjeldande budsjett for 2016. BLD føreslår derfor å redusere løyvinga under kap. 840 post 61 med 1,4 mill. kroner.

Kap. 841 Samliv og konfliktløysing

Post 21 Spesielle driftsutgifter, meklingsgodtgjersle, overslagsløyving

Prognosen for bruk av eksterne meklarar er lågare enn lagt til grunn i gjeldande budsjett for 2016. BLD føreslår derfor å redusere løyvinga under kap. 841 post 21 med 2,5 mill. kroner.

Kap. 844 Kontantstøtte

Post 70 Tilskot, overslagsløyving

Utgiftene til kontantstøtte er anslått til 1 570 mill. kroner, som er 10 mill. kroner lågare enn løyvinga. Mindrebehovet kjem av at talet på barn med kontantstøtte er lågare enn lagt til grunn i gjeldande budsjett for 2016.

BLD føreslår å redusere løyvinga under kap. 844 post 70 med 10 mill. kroner.

Kap. 845 Barnetrygd

Post 70 Tilskot, overslagsløyving

Utbetalingane til barnetrygd har til no i år vore noko lågare enn tidlegare lagt til grunn. Utgiftene i 2016 blir no anslått til 15 040 mill. kroner.

BLD føreslår å redusere løyvinga under kap. 845 post 70 med 100 mill. kroner.

Kap. 846 Familie- og oppveksttiltak

Post 21 Spesielle driftsutgifter, kan nyttast under post 50 og post 71

Støtta til forskingsprogrammet Sivilsamfunn og frivillig sektor 2014–2017 skal behandlast som kjøp og ikkje som tilskot. For å sikre korrekt postbruk føreslår BLD å auke posten med 0,8 mill. kroner mot ein tilsvarande reduksjon av kap. 846 post 70.

Det er behov for midlar til å leggje tilskotsordninga Barne- og ungdomstiltak i større bysamfunn inn i eit nytt, elektronisk saksbehandlingssystem. BLD føreslår å flytte 150 000 kroner til dette arbeidet til kap. 858 post 21.

Samla føreslår BLD å auke løyvinga under kap. 846 post 21 med 650 000 kroner.

Post 70 Barne- og ungdomsorganisasjonar

BLD føreslår å redusere løyvinga under kap. 846 post 70 med 0,8 mill. kroner. Sjå nærmare omtale under kap. 846 post 21.

Kap. 854 Tiltak i barne- og ungdomsvernet

Post 65 Refusjon for kommunale utgifter til barneverntiltak knytte til einslege, mindreårige asylsøkjarar og flyktningar, overslagsløyving

Løyvinga skal dekkje refusjon av kommunale utgifter til barneverntiltak for einslege, mindreårige asylsøkjarar og flyktningar.

Prognosen for totale utbetalingar er redusert i 2016 mellom anna fordi den gjennomsnittlege utbetalinga per barn i ordninga har gått ned og prognosen for busetjing av einslege, mindreårige flyktningar er redusert samanlikna med revidert nasjonalbudsjett 2016. Reduksjonen i busetjingsprognosen skuldast at talet på asylsøkjarar til Noreg er redusert.

BLD føreslår å redusere løyvinga på kap. 854 post 65 med 558,6 mill. kroner.

Post 71 Utvikling og opplysningsarbeid mv., kan nyttast under post 21

Regjeringa har sett i gang eit arbeid med å endre ansvarsdelinga mellom stat og kommune i barnevernet. BLD føreslår å tildele 250 000 kroner av midlane på posten til KS. Midlane skal gå til å førebu kommunane på framtidige endringar i det kommunale barnevernet.

Kap. 856 Barnevernets omsorgssenter for einslege, mindreårige asylsøkjarar

Post 1 Driftsutgifter

Løyvinga dekkjer utgifter til drift av statlege omsorgssenter for einslege, mindreårige asylsøkjarar under 15 år, kjøp av plassar i private omsorgssenter og forvaltningsoppgåver knytte til omsorgssentera.

Prognosen for talet på asylsøkjarar til Noreg er redusert sidan revidert nasjonalbudsjett 2016. Gjeldande løyving er basert på i gjennomsnitt 850 barn i omsorgssentera i 2016. Anslaget er no justert ned. Det er venta at det vil bu i gjennomsnitt 640 barn i omsorgssentera i 2016.

BLD føreslår å redusere løyvinga på kap. 856 post 1 med 358,8 mill. kroner

Kap. 3856 Barnevernets omsorgssenter for einslege, mindreårige asylsøkjarar

Post 4 Refusjon av ODA-godkjende utgifter

Nokre innanlandske utgifter knytte til mottak av asylsøkjarar og flyktningar kan ifølgje OECDs utviklingskomité godkjennast som offisiell utviklingshjelp. Beløpet som blir rapportert inn som utviklingshjelp, blir redusert som følgje av reduksjonen i løyvinga på kap. 856 post 1.

BLD føreslår å redusere løyvinga på kap. 3856 post 4 med 345,5 mill. kroner.

Kap. 858 Barne-, ungdoms- og familiedirektoratet

Post 21 Spesielle driftsutgifter

BLD føreslår å auke løyvinga under kap. 858 post 21 med 150 000 kroner. Sjå nærmare omtale under kap. 846 post 21.

Kap. 2530 Foreldrepengar

Post 70 Foreldrepengar ved fødsel, overslagsløyving

Utbetalingane til foreldrepengar er hittil i år noko lågare enn tidlegare lagt til grunn. Utgiftene til foreldrepengar i 2016 blir no anslått til 18 780 mill. kroner.

BLD føreslår å redusere løyvinga under kap. 2530 post 70 med 280 mill. kroner.

Post 71 Eingongsstønad ved fødsel og adopsjon, overslagsløyving

På grunnlag av utbetalingane hittil i år er utgiftene til eingongsstønad i 2016 no anslått til 450 mill. kroner.

BLD føreslår å redusere løyvinga under kap. 2530 post 71 med 10 mill. kroner.

Neste kapittel