Av næringsinntekt skal det normalt svarast 11 pst.
trygdeavgift, medan satsen er 7,8 pst. for lønsinntekt. Næringsdrivande
i fiskerinæringa betalar også 7,8 pst. trygdeavgift. Mellomlegget opp
til 11 pst. blir dekt av ei særskilt produktavgift. Produktavgifta
skal, forutan å dekkje mellomlegget i trygdeavgifta, òg dekkje kollektiv
medlemspremie til yrkesskadetrygd, kollektiv forsikring for tilleggssjukepengar
for manntalsførte fiskarar og utgifter i samband med stønad til
arbeidsledige i næringa. Det skal svarast produktavgift av all fangst
frå norskregistrerte fartøy. I statsbudsjettet for 2013 blei det vedteke
å setje produktavgifta til 2,6 pst. for 2013. I brev 12. april 2013
tilrår Fiskeri- og kystdepartementet at satsen blir oppjustert til
3 pst. frå og med 1. juli 2013.
Fiskeri- og kystdepartementet har vidare opplyst at
produktavgifta har eit akkumulert overskot per 1. januar 2013 på
71,9 mill. kroner. Årsaka er i hovudsak at førstehandsverdien i
2011 var langt høgare enn det som blei lagt til grunn ved fastsetjing
av produktavgifta for 2011. I 2012 var inntekter og utgifter om
lag i balanse. Ifølgje berekningar frå Fiskeri- og kystdepartementet
er differansen i avgiftsinntekter mellom ein sats på 3,5 pst. og
ein sats på 3 pst. 65 mill. kroner. Eit prinsipp for produktavgifta
er kostnadsdekking over tid.
Finansdepartementet foreslår derfor å auke produktavgifta
til 3 pst. frå 1. juli 2013, i tråd med forslag og berekningar frå
Fiskeri- og kystdepartementet. Det blir vist til forslag til vedtak om
endring i Stortingets vedtak om produktavgift til folketrygda for
fiskeri-, kval- og selfangstnæringa for 2013.
Komiteen slutter seg til regjeringens
forslag.