Begrunnelse

Høgre har jobba lenge for å få ein betre rovviltpolitikk. Allereie i 2007 hadde Høgre framlegg i Stortinget om ei grundig evaluering av rovviltforliket frå 2004. Regjeringa har ikkje følgt opp viktige føresetnader frå forliket, og det har vore aukande konfliktar. Ein forfeila rovviltpolitikk truar og fortrengjer i dag landbruket mange stadar.
Høgre var sterk pådrivar for å få på plass formuleringane om at rovviltforvaltninga skal bygge på respekt for eigedomsretten, enkeltmenneske og lokalsamfunn sin livskvalitet. Grunnen til det er at dagens rovviltforvaltning ikkje tek slike omsyn, og at vi ser at dette er ein av hovudgrunnane til at konfliktnivået aukar.
Folk som bur i rovviltbelasta områder opplever rovviltforvaltninga som arrogant og firkanta med god grunn. Det kan stillast store spørsmålsteikn med DN si handtering av rovviltforvaltninga, og deira tolking av regelverket. Todelt målsetting skulle legge til rette for at det kunne vere både beitedyr og rovdyr i same område. Dette har vore ein fiasko mange stadar.
Eit godt døme på at eigedomsretten blir sett til side er saka til en sauebonde i Grue. Her går rettar og næringsgrunnlag tapt på grunn av at rovvilt gjer det umogeleg å halde fram med sauehald. Han blir i tillegg nekta støtte til omstilling. Dette står i sterk kontrast til det som står i forliksteksten, og det må ryddast opp i dette omgåande.
Dei formuleringane som er vist til og som Høgre fekk på plass i det nye forliket skal vere eit sterkt signal om kursendring i rovviltpolitikken. Vi er uroa over det som kjem fram i media om liten vilje til endring frå forvaltninga si side. Derfor ser vi fram til eit godt og utfyllande svar frå statsråden.