Ráhkis olbmot,

Norgga gonagas, Su Majestehta Gonagas Harald, eretvádjolii odne.

Dál lea okta min njunušolbmuin guođđán min. Oppa Norgga álbmot morašta dál go min gonagas lea vádjolan, guhte lei 35 jagi gonagasdoaimmas.

Stuorradiggi lea váldán vuostá jápmindieđu stuorra morrašiin.

Gonagas Harald viđát lei riegádan dán doibmii. Su riegádeapmi, guovvamánu 21.beaivvi 1937, lei historjjálaš dáhpáhus.

Son lei vuosttaš gonagasbárdni gii riegádii Norggas 567 jagis, maŋŋel go álbmot válljii su áhčiáhči, Haakon VII, gonagassan 1905:s.

Gonagas Harald šattai 1991:s gonagassan áhčis maŋis, Olav V, ja son ovddastii dorvvolašvuođa ja bissovašvuođa.

Seamma ládje go su áhčči ja áddjá ovdal su, lei gonagas Harald álbmoga gonagas dakkár servodagas mas vuođđoláhka ja álbmotstivrejupmi adnojit vuođđun, ja son lei min vuođđo árvvuid ovddasteaddji.

Álbmoga dáhttu lei gonagas Haralda dáhttu.

Su válljodajaldat muitalii su doaimma: Norgga ovddas álo.

***

Gonagas Harald lei maid duostil ja ođasteaddji gonagas.

Áiggi rievdama mielde son ođasmahtii gonagasdoaimma, ja ovdánahtii monárkiija ja gonagasviesu rievddalmas dilis.

Son ovttas Dronnet Sonjain rabai Šloahta uvssaid álbmogii, ja son rabai maid Norgii uvssaid máilbmái.

Gonagas Harald vásihii hui persovnnalaččat gonagasvuođa hástalusaid ođđaáigásaš servodagas. Son ražai guhká oažžut lobi náitalit dainna gean son ráhkistii.

Go kruvdnaprinsa Haakona áigi lei válljet eallinguoimmi, de leigga gonagas Harald ja dronnet Sonja juo ráhkadan geainnu.

Ráhkisvuohta guovtti olbmo gaskkas lea stuorámus. Maiddái gonagasolbmuide.

***

Gonagas Harald lei geasuheaddji olmmoš. Dan sáhttet miehtá riika duođaštit duháhiid mielde olbmot geaiguin son deaivvadii.

Gonagas Haralda geasuheaddji reaškasat ja leaikkastallamat ožžo maid saji doibmii mas muđui lei stuora ovddasvástádus.

Son geavahii persovnnalašvuođa gonagasdoaimmas iige nuppe ládje ahte gonagasdoaimmain devddii iežas persovnnalašvuođa.

Gonagas Haralda deháleamos iešvuohta gonagassan lei várra liekkusvuohta ja duohta beroštupmi go deaivvadii olbmuiguin.

Son anii árvvus juohke olbmo, ja nu šadde olbmuidgaskasaš deaivvadeamit hui mearkkašahttin olu olbmuide.

Miehtá riika leat ollu olbmot muitalan ahte sidjiide bázii aigbeaivái muitun gonagasain beassat deaivvadit ja ságastallat, ja muhtimiidda dat lei maid mearrideaddji jorggáldahkan.

Gonagas Haralda galledeapmi doppe gosa dulvi dahje lihkuhisvuohta lei deaividan, geahpedii bákčasiid váttis dilis.

Gonagas Haralda liekkusvuohta guoskkahii ollugiid min riikkas ja olgoriikkas: erenoamážit go son sárdnestuolus čilgii ahte norgalaččat leat máŋggabealat álbmot, ja ahte Norggas lea sadji leat nu mo olmmoš lea.

***

Gonagas Haralda ráhkisvuohta álbmogii guoskkahii oppa našuvnna.

Oppa riikka moraštanáiggis maŋŋil terrora 22.07.2011, bijai son sániid dan botnihis bákčasii mii lea go massit lagasolbmo:

«Áhččin, ádján ja náittusguoibmin mun dušše binnánaš ádden din bákčasa. Riika Gonagassan mun moraštan juohke ovttain dis.»

Ganjalčalmmiiguin son čájehii iežas morraša.

Nu mo son lei minguin ilolaš bottuin, nu maid gonagas Harald juogadii minguin váttis dovdduid.

Gonagassan ja mielolmmožin.

Nu doaimmahii gonagas Harald Norgga ovddas buot.

***

Vaikko gonagasas lei alla ahki ja gonagasbearrašis gáibideaddji dilli, lei gonagas Harald gonagasdoaimmas gitta eallima lohppii.

Son čájehii ahte geatnegasvuohta ja fuolla sáhttet leat giehtalaga, ja son barggai ámmáhis seammá ráfálaš vugiin, liekkusvuođain ja gutnálašvuođain go iežas gonagasdoaimmas.

Almmatge lei sus rabasvuohta dan birra mii lei gáibideaddji ja deattuhii man dehálaš lea ovttasráđiid bargat ja doarjut guhtet guimmiideaset váttis áiggiid čađa.

***

Gonagas Harald ii lean dušše gonagas Norggas. Son lei maiddái náittusguoibmi, áhčči, áddjá ja viellja.

Min jurdagat mannet dál dronnet Sonjai, gonagas Haakonii ja oppa sin bearrašii.

Mii moraštit singuin, ja muittašit Gonagas Haralda váimmolaš gudnejahttimiin ja giitevašvuođain.  

***

Ja dás go mii muittašit ahte Gonagas Harald lea eretvádjolan, de min jurdagat mannet boahtteáigái.

Mii dearvvahit Norgga ođđa Gonagasa, Majestehta Gonagas Haakon VIII (gávccát), go son dál galgá gonagasdoaimma váldit iežas doaibman.

Mii deaivvadit Gonagasain Haakoniin luohttámušain dieđidettiin ahte son joatká áhčis doaimma. Álbmogii ja váhneneatnamii buorrin.

Mii čuvget ráfi Gonagas Harald V muitun.