Ved fjerning av arveavgifta ved lov 13. desember
2013 nr. 110, blei det innført eit kontinuitetsprinsipp ved arv
og gåve. Kontinuitet inneber at mottakar overtek føregjengarens skattemessige
verdi på eigedelar, og andre skatteposisjonar. Etter skattelova
§ 9-7 første ledd gjeld kontinuitetsprinsippet for dødsbu og einearving.
Det følgjer av første ledd andre punktum at det også gjeld for attlevande
ektemake som tek over buet uskifta. Etter arvelova kapittel III
A har også ein attlevande sambuar rett til å ta over visse eigedelar
i uskifta bu. Det er ingen grunn til at attlevande sambuar i uskifta bu
skal komme i ei anna stilling enn attlevande ektemake, og det er
ein feil at sambuar ikkje er nemnd på linje med ektemake i lovteksten
i skattelova § 9-7 første ledd andre punktum. Departementet foreslår
at dette vert retta opp.
Etter skattebetalingslova § 11-5 skal rentetillegg og
rentegodtgjering ved skatteavrekninga reknast ut med rentesats etter
skattebetalingslova § 11-6 andre ledd andre punktum som er lik styringsrenta
i Norges Bank, redusert med 28 pst., dvs. styringsrenta minus skatt.
Som følgje av at skattesatsen for alminneleg inntekt er redusert frå
28 pst. til 27 pst., foreslår departementet at skattebetalingslova
§ 11-5 blir endra slik at det ved utrekninga blir teke utgangspunkt
i styringsrenta, redusert med 27 pst. Departementet foreslår vidare
å endre skattebetalingslova § 11-5 tredje ledd bokstav b då det
ved ein feil er vist til likningsåret i staden for inntektsåret.
Ved lov 13. desember 2013 nr. 122 blei skattebetalingslova
§ 1-1 bokstav c endra ved at lova også omfattar tvangsmulkter etter
lov 19. mai 1933 om særavgifter § 5a, lov 19. juni 1959 nr. 2 om
avgifter som gjeld motorkjøretøy og båtar § 5a og tollova § 16-16.
Tvangsmulkt etter desse føresegnene gjeld ved bokføringspålegg,
jf. Prop. 1 LS (2013–2014) Skatter, avgifter og toll 2014 kapittel
18. Skattebetalingslova 1-1 bokstav c omfattar også andre tvangsmulkter.
For desse følgjer det av skattebetalingslova § 10-51 når dei forfell
til betaling. Tilsvarande reglar vart ikkje gitt for dei krav som
vart tatt inn i skattebetalingslova § 1-1 bokstav c ved lov 13. desember
2013 nr. 122. Departementet foreslår no tilsvarande reglar om betaling
i § 10-51, og foreslår dette ved ei endring av § 10-51 bokstav a.
I staden for at det i § 10-51 blir vist til det enkelte krav foreslår
departementet at det blir vist til tvangsmulkter som omhandla i
§ 1-1 bokstav c. Bokstav g i § 10-51 kan da opphevast.
Tollova § 3-3 regulerer meldeplikt for fartøy
til stad i tollområdet. Ved ein inkurie under handsaminga i Stortinget
av Prop. 1 LS (2013–2014) Skatter, avgifter og toll 2014 er overskrifta
til § 3-3 blitt misvisande, jf. Innst. 3 S (2013–2014). Departementet
viser til forslag til oppretting av overskrifta til tollova § 3-3.
I samband med budsjettet for 2014 fjerna Stortinget
omregistreringsavgifta for kjøretøy med tillaten totalvekt på 7 500
kg eller meir, sjå Innst. 4 L (2013–2014). Endringa vart gjennomført
ved ei endring i stortingsvedtaket om omregistreringsavgift § 1
avgiftsgruppe c, der ein presiserte at omregistreringsavgifta berre
omfattar motorvogner med tillaten totalvekt inntil 7 500 kg.
Meirverdiavgiftslova § 6-6 andre ledd fritek kjøretøy
som er omfatta av stortingsvedtaket om omregistreringsavgift frå
meirverdiavgift. Det kan derfor sjå ut som om fritaket no ikkje
lenger omfattar kjøretøy med tillate totalvekt på 7 500 kg eller
meir. Dette har ikkje vore meininga. Departementet foreslår derfor
å endre § 6-6 andre ledd slik at det kjem klart fram at fritaket
også omfattar kjøretøy med tillate totalvekt på 7 500 kg eller meir.
Departementet viser til forslag til oppretting av meirverdiavgiftslova
§ 6-6 andre ledd. Departementet foreslår at endringa tek til å gjelde
straks.
Overgangsstønad til einsleg mor og far er lagt om
for nye mottakarar frå 1. april 2014 og for alle mottakarar frå
2017. Stønaden skal skattleggjast som lønnsinntekt, og ikkje som
pensjonsinntekt som tidlegare. Nivået på stønaden er auka frå 2
gonger grunnbeløpet til 2,25 gonger grunnbeløpet for å kompensere
for høgare skatt. Frå same tid er reglane for avkorting av overgangsstønaden
mot arbeidsinntekt endra slik at stønaden vert redusert med 45 pst.
av arbeidsinntekt over halvparten av grunnbeløpet. For mottakarar
av stønaden før 1. april skal stønaden framleis skattleggjast som
pensjonsinntekt. Desse beheld stønadsnivået på 2 gonger grunnbeløpet
og avkortingssats på 40 pst.
Forslag til endringane i skattelova blei fremja
i Prop. 1 LS Tillegg 1 (2013–2014).
Forslag til endringane i nivået for overgangsstønaden
blei fremja i Prop. 198 L (2012–2013). Her står det at endringane
skal gjelde for nye tilfelle, og at dei tidlegare reglane skal gjelde for
einsleg mor og far som har søkt og fyller vilkåra for overgangsstønad
før regelendringane trer i kraft. Utfyllande reglar er gitt av Arbeids- og
sosialdepartementet i forskrift 13. mars 2014 nr. 270 om overgangsregler
i forbindelse med endringer i folketrygdloven kapittel 15 frå 1. april
2014.
Departementet har blitt merksam på at det ikkje er
heilt samsvar mellom føresegna om iverksetjing av endringane i skattelova
og folketrygdlova. For å unngå tvil om kva tilfelle som skal skattleggjast
som lønnsinntekt, vil departementet presisere at endringane i skattereglane
berre gjeld for dei som har motteke overgangsstønad etter satsen
på 2,25 gonger grunnbeløpet. For mottakarar av overgangsstønad som
fell inn under overgangsreglane av 13. mars 2014, skal stønaden
skattleggjast som pensjonsinntekt til og med inntektsåret 2016.
Komiteen slutter seg
til regjeringens forslag.