Spørsmål
Torgeir Knag Fylkesnes (SV): Mitt spørsmål går til utanriksministeren. Befolkningsutviklinga i Nord-Norge er alarmerande. Ifølgje ferske tal frå SSB er Troms, Finnmark og Nordland dei fylka som har hatt størst befolkningsnedgang, og aller verst er det i det høge nord.
«Kommunane som har utgjort dagens Troms og Finnmark har ikkje hatt ein større samla nedgang sidan 1997», skriv SSB. Det kom ut 23. februar i år. Dette skjer samtidig som regjeringa i både Sundvolden-plattforma og Granavolden-plattforma slår fast at nordområda er Noregs viktigaste utanrikspolitiske og strategiske ansvarsområde.
I nordområdemeldinga vi har til behandling i Stortinget no, skriv regjeringa:
Likevel skjer det altså ein kraftig befolkningsnedgang som ikkje har vore større sidan 1997, og som beviseleg har akselerert under denne regjeringa. I dette perspektivet er det nedslåande å lese nordområdemeldinga, for ho beskriv utfordringane i Nord-Noreg i detalj, ope og ærleg, men så er ho nærmast ribba for verkemiddel for korleis ein skal kunne betre livsgrunnlaget til folk i nord. Dette vert påpeikt ikkje berre av SV; det er sjølve gjennomgangstonen i alle svara frå høyringsinstansane til regjeringa. Her er det mykje beskriving og lite handling.
Mitt spørsmål til utanriksministeren er rett og slett: Viss det er av «nasjonal, sikkerhetspolitisk betydning at det bor folk i nord», kvifor sørgjer da regjeringa for den største befolkningsnedgangen sidan førre tusenår?