Alfred Jens Bjørlo (V): Landbruksministeren uttaler til Nationen 19.01 at det er EØS som hindrar at anna næringsliv enn landbruk kan få støtte frå Regjeringa for å avhjelpe vinterens høge straumprisar.
Stiller finansministeren seg bak denne påstanden, og kan ministeren gjere greie for kva dialog regjeringa har hatt med ESA for å avklare det nasjonale handlingsrommet for å få på plass virkemiddel som kan hjelpe bedrifter som slit med høge straumprisar?
Grunngiving
Landbruksministeren er sitert på følgjande i Nationen 19.01, i samband med framlegginga av dei gledelege nyhenda om ei straumstøtteavtale for landbruket:
«Nå vil debatten komme på hvorfor ikke annet næringsliv får støtte, og det er på grunn av EØS. Så ærlig må man være (...) Det er EØS som gjør at annet næringsliv ikke kan få støtte.»
Senterparti-statsrådar har i det siste ved fleire høve blitt nøydd til å moderere i ettertid påstander om at EØS-avtalen hindrar innføring av nasjonal politikk i Noreg. Eg syner her mellom anna til diskusjonen knytt til lønnsstøtteordninga før jul, og til Landbruksministeren sine påstandar i brev til Stortinget i desember om at EØS-avtalen står i vegen for innføring av skjerpa krav til dyrevelferd i landbruket.
Når det gjeld straumstøtte til norske bedrifter i ei akutt straumkrise, er det på bakgrunn av Landbruksministeren sin kategoriske påstand om at dette er umulig, viktig for Stortinget å vite kva initiativ regjeringa har tatt for å utforske handlingsrommet innanfor EØS-avtalen for å hjelpe norske bedrifter som slit med høge straumprisar.
Eg syner her særskilt til at EU-kommisjonen i oktober 2021 la fram ei «verktøykasse» med tiltak medlemslanda kan nytte for å gje ulike former for straumstøtte både til hushaldningar og næringsliv. Det blir i denne verktøykassa peikt på at ei rekkje medlemsland allereie har sett inn tiltak for å avhjelpe dei høge straumprisane med økonomiske støtteordningar – og at småbedrifter i mange land er omfatta av slike tiltak. Det blir også peikt på at statsstøttereglene innanfor gitte rammer gjev fleksibilitet til å avhjelpe situasjonen.
Frå min og Venstre sin ståstad er det ein merkeleg kontrast mellom EU-kommisjonen si offensive verktøykasse for å hjelpe næringslivet i ei akutt straumkrise, og den norske Landbruksministeren sitt forsøk på å skubbe skulda for at den norske regjeringa ikkje vil gjere det same over på EU og EØS.
Eg ser fram til å få informasjon om kva faktagrunnlag Landbruksministeren har for sine sterke påstander, og kva innsats regjeringa har lagt ned for å utforske handlingsrommet for straumstøtte til norsk næringsliv innanfor EØS-avtalen.